Karen Vibes

နိဒါန်း
ကရင်အမျိုးသားလွတ်မြောက်ရေးခရီးစဉ်၏ လမ်းပြကြယ်၊ KNU ဥက္ကဋ္ဌဟောင်းနှင့် ကရင်အာဇာနည်ခေါင်းဆောင်ကြီး စောဘဦးကြီး (Saw Ba U Gyi) ၏ ဘဝဖြစ်စဉ်၊ ပညာရေးနှင့် ကရင်လူမျိုးတို့အတွက် ချမှတ်ခဲ့သော မူဝါဒများကို အသေးစိတ်ဖော်ပြပေးလိုက်ပါသည်။

စောဘဦးကြီး၏ အဓိက အနှစ်ချုပ် အချက်အလက်များ (Key Facts)

၁။ ငယ်ဘဝနှင့် ဗြိတိန်နိုင်ငံ ပညာရေးခရီး

စောဘဦးကြီးကို ၁၉၀၅ ခုနှစ်၊ အောက်တိုဘာလတွင် ဧရာဝတီတိုင်း၊ ကန်ကြီးဒေါင့်မြို့နယ်၊ ဘဲဂရက်ကျေးရွာ၌ အဖ စောသာမြတ်ကြီး၊ အမိ နော်အေးနုတို့မှ ဖွားမြင်ခဲ့သည်။ (မှတ်တမ်းအချို့တွင် ၁၉၀၃ သို့မဟုတ် ၁၉၀၄ ဟု ကွဲပြားမှုရှိသည်)။ သူသည် ကြွယ်ဝချမ်းသာသော မျိုးရိုးမှ ဆင်းသက်လာသူဖြစ်ပြီး မွေးချင်း ၅ ယောက်အနက် ဒုတိယမြောက်သားဖြစ်သည်။

သူ၏ ပညာရေးခရီးလမ်းမှာ ထူးချွန်ထက်မြက်လှသည် –

• အခြေခံပညာ: ပုသိမ်မြို့ စကောကရင်အထက်တန်းကျောင်း (ကိုသာဖြူကျောင်း) နှင့် မော်လမြိုင်မြို့ အထူးအင်္ဂလိပ်ကျောင်း။
• ဥပဒေပညာ: အင်္ဂလန်နိုင်ငံ Cambridge University နှင့် Oxford University (Magdalene College) တို့တွင် ပညာသင်ကြားခဲ့ပြီး ၁၉၂၈ ခုနှစ်တွင် ဥပဒေဘွဲ့ ရရှိခဲ့သည်။
• Barrister At Law: ၁၉၂၉ ခုနှစ်တွင် အင်္ဂလန်နှင့် ဗြိတိသျှအင်ပါယာတစ်ခုလုံး၌ ရှေ့နေလိုက်ခွင့်ရှိသည့် အဆင့်မြင့်ဆုံး ဝတ်လုံတော်ရ (Barrister At Law)ဖြစ်လာခဲ့သည်။

၂။ ရှေ့နေဘဝမှ နိုင်ငံရေးလောကသို့ ခြေလှမ်းခြင်း

၁၉၂၉ ခုနှစ်တွင် ဗမာပြည်သို့ ပြန်လာပြီး ရှေ့နေအဖြစ် အမှုထမ်းခဲ့သည်။ ၁၉၃၈ ခုနှစ် ရှမ်းမင်းသားတစ်ဦး၏ နန်းတွင်းလုပ်ကြံမှုတွင် ရှေ့နေလိုက်ပေးခဲ့ရာမှ ကွင်းလုံးကျွတ်လွတ်အောင် စွမ်းဆောင်နိုင်ခဲ့သဖြင့် အထူးကျော်ကြားလာခဲ့သည်။ ၁၉၄၂ ခုနှစ်တွင် ကရင်-ဗမာ သင့်မြတ်ရေးအတွက် ခေါင်းဆောင်များနှင့်အတူ လှည့်လည်ဟောပြောခဲ့ပြီး ကရင်ဗဟိုအဖွဲ့ချုပ် (KCO) ၏ အဖွဲ့ဝင်တစ်ဦး ဖြစ်လာခဲ့သည်။

၃။ နိုင်ငံတော်အဆင့် တာဝန်များနှင့် KNU ဥက္ကဋ္ဌဘဝ

စောဘဦးကြီးသည် ဗိုလ်ချုပ်အောင်ဆန်းနှင့်အတူ သီဟိုဠ်ကျွန်း (သီရိလင်္ကာ) သို့ သွားရောက်ကာ မျိုးချစ်တပ်မတော် (Burma Regular Army) ဖွဲ့စည်းရေး ဆွေးနွေးပွဲတွင် ပါဝင်ခဲ့သည်။

• ၁၉၄၆ ခုနှစ်တွင် သတင်းနှင့် ဝါဒဖြန့်ချိရေးဆိုင်ရာ ဝန်ကြီး အဖြစ် တာဝန်ထမ်းဆောင်ခဲ့သည်။
• ၁၉၄၇ ခုနှစ်တွင် ကရင်အမျိုးသားအစည်းအရုံး (KNU) ဖွဲ့စည်းသောအခါ အဖွဲ့ဝင်ဖြစ်လာပြီးနောက် ဝန်ကြီးအဖြစ်မှ နုတ်ထွက်ကာ KNU ၏  ဥက္ကဋ္ဌ အဖြစ် ရွေးချယ်ခံခဲ့ရသည်။

၄။ လက်နက်ကိုင်တော်လှန်ရေးနှင့် ကော်သူးလေအစိုးရ

၁၉၄၉ ခုနှစ် ဇန်နဝါရီလ ၃၁ ရက်နေ့တွင် စတင်ခဲ့သော ကရင်အမျိုးသား လက်နက်ကိုင်တော်လှန်ရေးကို ဦးဆောင်ခဲ့ပြီး ရက်ပေါင်း ၁၁၁ ရက် ကြာမြင့်ခဲ့သည့် အင်းစိန်တိုက်ပွဲကို ဗဟိုမှနေ၍ ကွပ်ကဲခဲ့သည်။ ၁၉၄၉ ခုနှစ် ဇူလိုင်လတွင် တောင်ငူမြို့၌ ဖွဲ့စည်းခဲ့သော ကော်သူးလေအစိုးရအဖွဲ့ (KGB) တွင် ပထမဆုံးသော ဝန်ကြီးချုပ်အဖြစ် တာဝန်ယူခဲ့သည်။

၅။ သမိုင်းဝင် “စောဘဦးကြီး၏ မူ (၄) ချက်”

၁၉၅၀ ပြည့်နှစ် ဖာပွန်ညီလာခံတွင် ကရင်တမျိုးသားလုံးအတွက် မရှိမဖြစ်လိုအပ်သော အောက်ပါ မူ (၄) ချက် ကို တရားဝင် ထုတ်ပြန်ကြေညာခဲ့သည် –
၁။ လက်နက်ချစကား အလျှင်းမပြောရ။
၂။ ကရင့်လက်နက် ကရင့်လက်ထဲတွင် ရှိရမည်။
၃။ ကရင့်ကံကြမ္မာ ကရင်ဖန်တီးရမည်။
၄။ ကရင်ပြည်ကို အသိအမှတ်ပြုခြင်း ပြီးပြည့်စုံရမည်။

ထို့ပြင် တော်လှန်ရေးအောင်မြင်ရန်အတွက် “ရန်သူပေးလို့ရခြင်း၊ အနိုင်တိုက်၍ရခြင်းနှင့် ပြင်ပအခြေအနေ တွန်းပို့မှုကြောင့်ရခြင်း” ဟူသော နည်းလမ်း (၃) သွယ်ကိုလည်း လမ်းညွှန်ခဲ့သည်။

၆။ အာဇာနည်ပီပီ ဂုဏ်ပြောင်စွာ ကျဆုံးခြင်း

၁၉၅၀ ခုနှစ်၊ သြဂုတ်လ ၁၂ ရက်နေ့တွင် ကော့ကရိတ်ဘက်သို့ ခရီးချီတက်စဉ် ထို့ကော်ကိုးရွာ၌ သစ္စာဖောက်မှုကြောင့် ရန်သူ၏ ဝိုင်းဝန်းတိုက်ခိုက်ခြင်းကို ခံခဲ့ရသည်။ အင်အားချင်းမမျှသော်လည်း အညံ့မခံဘဲ ပြန်လည်ခုခံတိုက်ခိုက်ရင်း ကရင်အမျိုးသားတို့အတွက် ဂုဏ်ပြောင်စွာ အသက်ပေးလှူခဲ့သည်။